9 أسباب تجعلك تستخدم لمبات ليد بدلا من أى نوع اخر
لمبات الليد موجودة بقالها سنين لكن وجودها فى مصر مقتصر على اخر كام سنة ..
1- استهلاك 9 منها للكهرباء اقل من استهلاك لمبة واحدة من لمبات التنجستين الصفراء .. . لان اكبر واحدة من النوعية دى بتستهلك 9 وات فى حين ان اللمبة الصفراء بتستهلك 100 وات .
2- عمرها الافتراضى بيتخطي 10 آلاف ساعة .. واى حد مننا جرب اللمبات الموفرة العادية يعرف انها بتبوظ بسرعة للاسف ... واللمبات الصفراء عمرها طويل لكن بتهلك الكهرباء ..
3- صحيح سعرها ضعف اللمبة الموفرة .. تقريبا 20 جنيه .. لكن للسببين اللى قلناهم فى الاول .. المحصلة انها هتبقى موفرة اكتر من اى لمبة تانية .. ارخص بكتير.
4- صيانتها سهلة جدا .. انا مبصتش على دايرتها لحد دلوقتى بس متوقع انها تكون من مكونات بسيطة مقاومة ودايودين ومكثف ..
5- ضد الكسر .. ودى ميزة هايلة مش موجودة فى اى نوع تانى .
6- اضائتها مريحة للعين .. ودايما كانت من اولويات المهندسين انهم ينتجوا لمبة اضائتها اقرب ما تكون لاضاءة الشمس .. ولمبة الليد هى اكتر لمبة بتطلع ضوء اطيافه قريبة من اطياف ضوء الشمس .
7- مبتسخنش زى اللمبات التانية .. مفيش اى حرارة بتتولد بسبب التشغيل .. ودا مش بس معناه انها آمنة ومش هتتسبب فى احترار المكان .. دا كمان معناه ان كل الكهرباء اللى دفعتها علشان تشغل اللمبة اتحولت لضوء .. مش زى اللمبات التانية جزء منها اتحول لضوء وجزء اتحول لحرارة .
8- متوقع ان هيتم انتاجها محليا فى مصانع الانتاج الحربي قريبا .. كان فيه كلام على كدا لكن معرفش وصلوا لايه .. امكانيات المصانع الحربية عالية جدا وتقدر تعملها .. علشان كدا سعرها هيقل جدا لو تم تصنيعها محليا .
9- كنت قريت قبل كدا خبر انها هتتوزع على البيوت بالتقسيط والقسط هيتم تحصيله ضمن فاتورة الكهرباء.. لكن برضو محصلتش اى خطوة فعلية .. وياريت دا يحصل .. هتبقى حركة هايلة جدا وموفقة .